Chennai Silks weaves world's costliest saree at INR 40 Lakhs

ലോകത്തെ ഏറ്റവും വില കൂ‍ടിയ സാരി ഒന്നു കാണണമെന്നുണ്ടോ?  കൊച്ചിയില്‍ എം.ജി റോഡിലുള്ള ദി ചെന്നൈ സില്‍ക്ക്‌സിന്റെ ഷോറൂമില്‍ എത്തിയാല്‍ മതി. നാല്‍പ്പതു ലക്ഷം രൂപ വിലമതിക്കുന്ന ഈ സാരി അവിടെയുണ്ട്; ഏതാനും ദിവസത്തെ പ്രദര്‍ശനം മാത്രം. കണ്ടാല്‍ മാത്രം പോര, വാങ്ങണമെന്നുണ്ടെങ്കില്‍ മുന്‍‌കൂട്ടി ബുക്ക് ചെയ്യണം. എട്ടു കിലോ ഭാരമുണ്ടെന്നത് ഒരു പ്രശ്നമല്ലെങ്കില്‍ വാങ്ങിയ സാരി ഉടുക്കാനും പറ്റും!

ഗിന്നസ് ബുക്കില്‍ സ്‌ഥാനം നേടിയ ഈ സാരിയുടെ വിശേഷങ്ങള്‍ കേട്ടോളൂ: പ്ലാറ്റിനം, സ്വര്‍ണം, ഡയമണ്ട്, റൂബി, എമറാള്‍ഡ്, യെല്ലോ സഫയര്‍, സഫയര്‍, പേള്‍, ക്യാറ്റ്‌സ് ഐ, ടോപാസ്, കോറല്‍ ഇവയെല്ലാം ഈ സാരി  നെയ്‌തെടുക്കാന്‍ ഉപയോഗിച്ചിട്ടുണ്ട്.
രാജാരവിവര്‍മയുടെ പതിനൊന്നു പെയ്‌ന്റിംഗുകള്‍ ഈ സാരിയില്‍ കൈകൊണ്ട് നെയ്‌തെടുത്തിട്ടുണ്ട് എന്നതാണ് മറ്റൊരു പ്രത്യേകത; വ്യത്യസ്‌ത സംസ്‌കാരിക പശ്‌ചാത്തലത്തിലുള്ള പതിനൊന്നു സ്‌ത്രീകളുടെ ചിത്രങ്ങള്‍. സാരിയുടെ ബോര്‍ഡറിലും രാജാരവിവര്‍മയുടെ വേറെ പെയ്‌ന്റിംഗുകള്‍  തുന്നിച്ചേര്‍ത്തിട്ടുണ്ട്.

മുപ്പതു നെയ്‌ത്തുകാര്‍ ഏകദേശം 4650 മണിക്കൂറു കൊണ്ടാണ് ഈ പട്ടുസാരി നെയ്‌തെടുത്തത്.  ഈ സാരിയുടെ അതേ രൂപം കുറഞ്ഞ വിലയ്ക്കും കിട്ടും; രത്‌നങ്ങളുടെയും സ്വര്‍ണത്തിന്റെയുമൊക്കെ അളവു കുറയുമെന്നു മാത്രം. രണ്ടു ലക്ഷം രൂപയ്ക്ക് ഒറിജിനലിന്റെ ഒറിജിനല്‍ ഡ്യൂപ്ലിക്കേറ്റ് ദി ചെന്നൈ സില്‍ക്ക്‌സില്‍ ലഭ്യമാക്കിയിട്ടുണ്ട്. അതിനു ബുക്ക് ചെയ്യേണ്ട, നേരെ ചെന്നു വാങ്ങിയാല്‍ മതി. കല്യാണസാരി എല്ലാവരുടെയും ശ്രദ്‌ധാകേന്ദ്രമാകട്ടെ!

| Savitha Sijo

A closer look at world's costliest saree