ഒരു തിരിച്ചുവരവിന്റെ പാതയിലാണ് വെൽവറ്റ്. തൊണ്ണൂറുകളുടെ അവസാനം ജ്വലിച്ചുയർന്ന് പിന്നീട് കെട്ടടങ്ങിയ ഫാഷനാണ് വീണ്ടും തലപൊക്കുന്നത്.  അന്ന് എല്ലാവർക്കുമുണ്ടായിരുന്നു ഒരു വെൽവറ്റ് ചുരിദാറും ബ്ലൗസും. എംബ്രോയിഡറി ചെയ്‌ത് മനോഹരമാക്കിയ ആ  ചുരിദാറിനെക്കുറിച്ചുള്ള സ്‌മരണകൾ പോലും മങ്ങി തുടങ്ങിയപ്പോഴാണ് വീണ്ടുമുള്ള ഈ വരവ്.

മെട്രോ നഗരങ്ങളിൽ അരങ്ങേറുന്ന ഫാഷൻ ഷോകളിലാണ് ഇപ്പോൾ വെൽവറ്റ് വീണ്ടും തലകാട്ടുന്നത്. വെൽവറ്റ് ലെഹങ്ക, ചോളി, ജാക്കറ്റ്, പാന്റ്സ്, സ്കാർഫ്,  ബ്ലൗസ് അങ്ങനെ പോകുന്നു.  ബോർഡറായും പൈപ്പിങ്ങിനായും മാത്രം  വെൽവറ്റ് ഉപയോഗിക്കുന്നവരുമുണ്ട്. കാണാനഴകും മൃദുവുമാണെങ്കിലും  ഈ  തുണിത്തരം  വളരെ ഹെവിയാണെന്ന പരാതിക്കാർക്കു വേണ്ടി.

നോർത്ത് ഇന്ത്യൻ വിവാഹങ്ങളിലും വെൽവറ്റ് ധാരാളമായി കാണാം.  കോടികൾ പൊടിച്ച്  അവിടെ നടത്തുന്ന വിവാഹമാമാങ്കങ്ങളിൽ ചിലത് അരങ്ങേറുന്നത് പഴയ കൊട്ടാരങ്ങളിലും മറ്റുമാണ്. അപ്പോൾ വധൂവരന്മാർക്ക്  രാജകീയ ഭാവം നൽകാൻ വെൽവറ്റിലും മികച്ചത് മറ്റെന്താണ്? വെൽവറ്റ്- ഷിഫോൺ മിക്‌സ് ലെഹങ്കകളും അവിടെ ട്രെൻഡാണ്. ബാഗ്, ഷൂസ് തുടങ്ങിയ ആക്‌സസറീസിനും വെൽവറ്റ് ഉപയോഗിക്കുന്നവരുണ്ട്.

| Zeba